Тус үзүүлэлтийг шинэчлэх магадлалтай хоёр наймаа яригдаж байгаагаас хамгийн боломжтой нь “Милан”-ы Кака “Челси”-д очих явдал юм. Одоогоос жилийн өмнө “Реал” клуб түүний төлөө 90 сая евро санал болгож байсан ч Сильвио Берлускони супер одоо зарах саналаас эрс татгалзсан билээ. Тэгвэл өнөөдөр “Челси” тэдэнд 80 сая фунтыг санал болголоо.

“Милан” Какагаа явуулахгүй хэмээн мэдэгдэж байгаа ч санхүүгийн хямралаа дарахад хангалттай хүрэлцэж, дээр нь шинэ тоглогчид авахад нэмэрлэгдэх их мөнгөөс татгалзаж чадахгүй байгаа сурагтай. Хэрэв түүнийг худалдахгүй байя гэвэл цалингийн асуудал үүснэ. Кака дэлхийн хамгийн өндөр орлоготой хөлбөмбөгчдийн нэг. Гэтэл түүнээс илүү гарна уу гэхээс дутахааргүй хөлс авдаг Роналдиньог 21 сая еврогоор “Милан” өөрийн болгочихоод байдаг. Ханаж цадахыг үл мэдэгч хоёрт хэдэн арван саяар тоологдох пүнлүүг хэдэн зуун мянгаар тоологдох шагналын хамт нэг улиралд өгнө гэдэг Италийн клубт ахадсан хэрэг ажээ. Тиймээс “Челси” тэдний санхүүгийн бэрхшээл дээр нь тоглолт хийн яаж ч зөрүүдлээд татгалзахааргүй саналыг тавиад байна. Ингэхдээ Абрамовичийн хүмүүс Какаг агент Диого Кошогийн нь хамт ухуулаад амжжээ. Албан бус мэдээгээр Кошо наймааг гүйцэлдүүлж чадах аваас Оросын саятнаас урамшууллын мөнгө авах нууц тохироо хийсэн сурагтай.

Харин Какад “Милан”-д авч байгаа цалингаас хавьгүй их цалин амласнаар англичууд XXI зууны манлай наймааг хийх ажлаа шулуутгажээ. Одоо тэд Берлусконигийн багийн дэд ерөнхийлөгч Галлианигийн өгөх хариуг хүлээн сууж байна. Хэрэв бразил тоглогчийг өөрийн болговол “Челси” Фрэнк Лампардыг “Интер”-т өгөх төлөвлөгөө боловсруулсан гэнэ. Англи хөлбөмбөгч гэрээ дуусч байгаагаа далимдуулан клубээсээ толгой эргэм их цалин нэхэж байгаа тул Абрамович түүнтэй хийх хэлэлцээрээ санаатай удаашруулж байгаа ажээ.

Ийнхүү “Челси” бэл бэнчинтэйгээ харуулан дэлхийн дээд амжилтыг эвдэх наймааг эхлүүлээд байгаа бол “Реал” үүнээс ч их зоос оролцсон хэлэлцээрийг өдөөгөөд удлаа. Тэдний үхэн хатан зүтгээд байгаа бай нь  Криштиану Роналду юм. Эзэн хааны баг 23 настай эрийг өөрийн болгохын тулд “МЮ”-д 85 сая евро буюу 134 сая доллар өгөхөд бэлэн байгаагаа мэдэгдсэн. Гэвч Алекс Фергюсон эрс татгалзсаар өдийг хүрлээ. Гэсэн ч испаничууд португал тоглогчийн “Реал”-д тоглох гэсэн мөрөөдөлд нь дөрөөлөн тоглолт хийх болсон. Үүнд хилэгнэсэн Фергюсон “Реал”-ыг үзэн ядаж байгаагаа хэлж, “Роналдугийн амьдралыг там болгоно” хэмээн ярьж олон нийтийн гайхлыг төрүүлжээ. Гэхдээ энэ мэдээллийг шуугиан дэгдээхдээ гаршсан Британийн хэвлэлүүд цацаж Испани, Английн лигүүдийн дунд дайн гаргах дөхсөн.