|
Европын долоон удаагийн аварга Италийн “АС Милан” клуб Английн цомын төлөөх тэмцээний аварга “Портсмаут” клубтэй UEFA-гийн цомын төлөөх тэмцээний хэсгийн тоглолтод нэг хэсэгт өрсөлдөхөөр болсон байна. Италийн “Сери А” лигийн тоглолтыг амжилт муутайхан эхэлсэн Миланчууд UEFA-гийн цомын төлөөх тэмцээнд аваргалж үзээгүй бол “Портсмаут” клубын хувьд анх удаагаа Европын тэмцээнд хүч сорьж байгаа юм...
“АС Милан” болон “Портсмаут” нар тэмцээний “Е” хэсэгт өрсөлдөх бөгөөд мөн энэ хэсэгт Голландын “Херенвен”, Португалийн “Брага” болон Германы “Вольфсбург” клубууд багтжээ. Хэсэг бүрээс гурван баг хэсгээсээ шалгарч гарах юм. Помпейчуудын “Премьер лиг”-ийн өрсөлдөгчид болох “Тоттенхэм” клуб “Сери А” лигийн тэргүүлэгч “Удинезе” клубын хамт тэмцээний "D" хэсэгт хуваарилагджээ. “Тоттенхэм” клуб аравдугаар сарын 23-нд “Удинезе”-ын талбай дээр тоглосны дараа Оросын “Спартак Москва”, Хорватын “Динамо Загреб” болон Голландын “НЕК” клубуудтэй UEFA-гийн цомын төлөөх тэмцээний "D" хэсэгт хүч сорино. Испанийн “Севилья” клубын хувьд тэмцээний “С” хэсэгт Германы “Штутгарт”, Италийн “Сампдор”, Сербийн “Партизан” болон Бельгийн “Стандард Льеж” багуудтай сугалаагаар учирчээ. Харин тэмцээний “А” хэсэгт Германы “Шальке 04”, Францын "PSG", Английн “Манчестер Сити”, Испанийн “Расинг Сантандер” болон Голландын “Твенте” багууд өрсөлдөх юм. Түүнчлэн “В” хэсэгт Грекийн аварга “Олимпиакос”, Туркийн “Галатасарай” клубуудээс гадна Португалийн “Бенфика”, Германы “Херта Берлин” болон Украины “Металлист Харьков” нар багтжээ. Өөр нэгэн өрсөлдөөн ихтэй хэсэгт “Бундес лиг”-ийн тэргүүлэгчид болох “Гамбург”, Голландын “Аякс”, Чехийн “Спарта Праг”, Английн “Астон Вилья” болон Словакийн “Жилина” нар өрсөлдөх бол “Валенсиа”, “Бругге”, “Росенбург”, Данийн “Копенгаген” болон Францын “Сент-Этьен” нар нэг хэсэгт багтсан байна. Түүнчлэн Испанийн “Депортиво Ла-Корунья” клуб Оросын “ЦСКА Москва”, Голландын “Фейеноорд”, Люксембургийн “Нанси” болон Польшийн “Лех” клубууд нэг хэсэгт өрсөлдөхөөр сугалаа таарсан юм. Хэсгийн эхний тоглолтууд аравдугаар сарын 23-нд эхлэх бөгөөд харин UEFA-гийн цомын төлөөх тэмцээний аваргын тоглолт ирэх тавдугаар сард Туркийн нийслэл Истанбул хотноо болох юм.
 |
