|
Монголын боксын спорт 60 нас хүрлээ. |
|
|
|
|
Бичсэн S. Uuganbayar
|
|
Friday, 2008 оны 07 сарын 25 |
|
 
Монгол Улсад сонирхогчдын боксын спорт үүсч хөгжсөний 60 жилийн ой энэ өдрүүдэд тохиож байгаа бөгөөд энэхүү түүхт ойг тэмдэглэх үйл ажиллагаа маргааш албан ёсоор эхлэх юм байна.
Монголын олимпийн боксын холбооны ерөнхийлөгч, "Эрдэнэт" уулын баяжуулах үйлдвэрийн Улаанбаатар хот дахь суурин төлөөлөгч Д.Цогбаатартай уулзаж Монголын үе үеийн боксчид 60 жилийнхээ ойг хэрхэн тэмдэглэж өнгөрүүлэх гэж байгаа талаар сонирхоход:
-Бид энэ ойг тэмдэглэхдээ зүгээр нэг баярлаад өнгөрөх биш хамгийн гол нь үе үеийн ахмад боксчид маань ямар гавьяа байгуулж явсан, залуу үе маань өнөөдөр ямар амжилт үзүүлэв, цаашид ямар амжилтад хүрэх ёстой вэ гэдгээ дүгнэж цэгнэж ярилцах юм. Мөн олимпод оролцох дөрвөн тамирчнаа сэтгэл санааны өндөр бэлтгэлтэй явуулахаар энэ жилийн ойгоо зохион байгуулж байгаа. Энэ хүрээнд тамирчдынхаа бэлтгэлийг хангах үүднээс долдугаар сарын 24-27-нд гадаадын цөөн улс оролцуулсан олон улсын тэмцээн зохиох гэж байна гэлээ.
Боксын спортын түүхийг сөхвөл, Монголын гучаад залуу 1928-1930 онд Франц, Германд сурч байж. Тэдний дотор ардын зураач Намхайцэрэн, анхны мал зүйч, академич Аюурзана гээд манай олон нэртэй хүмүүс байсан аж. Францад сурч байсан Т. Аюурзана /Монгол Улсын гавьяат зоо техникч, төрийн шагналт/ боксын секцэд хичээллэн хэд хэдэн тэмцээнд амжилттай оролцож, хамт сурч байсан нөхөд нь ч их дэмждэг байжээ. Тэгэхээр орчин үеийн боксын спортоор хичээллэж, тоглосон анхны монгол хүн Аюурзана гуай гэж болно. Үүнээс хойш хуучин ЗХУ-ын Воронеж мужийн Борисоглебск хотын нисэхийн дунд сургуульд 1943-1945 онд суралцаж байсан Н.Лувсандорж гэдэг хүн тэнд боксоор хичээллэж боксын анхны мэдэгдэхүүнтэй болж эх орондоо ирж боксыг дэлгэрүүлсэн түүхтэй ажээ.
Манай оронд анх 1948 оны Ардын хувьсгалын 27 жилийн ойн баяр наадмаар боксын тэмцээн болж есөн тамирчин оролцсоноос "Соёл" нийгэмлэгийн М.Сэр-Од /БНМАУ-ын Тээвэр, холбооны яамны сайд, Гадаад худалдааны яамны Монголэкспорт-Монголимпорт нэгдийн даргаар ажиллаж байсан/ түрүүлж байжээ. Монголын боксын спорт 60 жилийн түүхэндээ 1963-1967 онд үзэл суртлын золиос болж хаагдаж байсан аж. Өнөөдөр боксын спортоор олимпийн хүрэл медальт хоёр, ДАШТ-ий мөнгөн медальт гурав, хүрэл медальт нэг, Ази тивийн аварга арав гаруй төрж гарсан амжилтаараа чөлөөт бөх, жүдо бөхийн дараа орж байгаа юм.
 |
|
Сүүлд шинэчлэгдсэн ( Friday, 2008 оны 07 сарын 25 )
|
